AL
EN
Në vijim të
angazhimit që KLSH ka marrë së bashku me SAI-t e Kosovës dhe Maqedonisë së
Veriut, si dhe në bashkëpunim me UN Women Albania për të zhvilluar auditimin e
përbashkët me temë, “Barazia gjinore dhe
fuqizimi i grave nga zonat rurale, përmes përfshirjes në tregun e punës”,
në datat 14-15 Dhjetor 2023, u zhvillua në Shkup takimi rajonal ku morën pjesë
grupet e auditimit të secilit SAI si dhe përfaqësues të UN Women nga vendet
pjesë e këtij projekti.
Takimi u organizua
nga UN Women dhe objektivi kryesor i tij ishte diskutimi ndërmjet grupeve të
auditimit për rezultatet e auditimit, si dhe diskutimi i gjetjeve dhe
rekomandimeve. Në këtë takim KLSH u përfaqësua nga grupi i auditimit, znj.
Ermira Vojka, përgjegjëse e grupit të auditimit, znj. Arminda Bushi, dhe Jorida
Zhegu anëtare.
Secili grup
prezantoi gjetjet dhe rekomandimet e auditimit. Pas prezantimeve përkatëse, u
diskutua rreth gjetjeve që SAI-t kishin të njëjta, si dhe për ato që ishin
specifike për secilin vend. Diskutimet vijuan me rekomandimet që do të jepen
ndaj subjekteve nën auditim, ku theksi u vendos në rëndësinë që kanë
rekomandimet për përmirësimin e situatës së punësimit të grave rurale. Në këto
diskutime u përfshinë edhe ekspertët e UW Women të cilët dhanë sugjerimet e
tyre lidhur me rekomandimet e auditimit.
Në takim gjithashtu u diskutua edhe për mënyrën e prezantimit të rezultateve të auditimit, ku përfaqësuesit e SAI-t të Maqedonisë së Veriut dhe zyrës së UN Women Maqedoni e Veriut, sugjeruan që përtej kanaleve të përhershme të komunikimit të rezultateve, për këtë auditim do të përgatitet edhe një video vetëm me foto që do të ilustrojnë gjetjet e auditimit të përmbledhura në raportin e përbashkët të auditimit.
Foto: UN Women Albania
Në përfundim,
grupet e auditimit dhe pjesëmarrësit u dakordësuan në parim për vijimësinë e
punës deri në takimin e ardhshëm.